سوچ در سوچ میری خواب اترتے ہی رہے
تیری یادوں کے کئی چاند پگھلتے ہی رہے
رات ہولے سے سرکتی رہی سر سے میرے
پر تیرے خواب میری آنکھ میں جلتے ہی رہے
زندگی بھر کا کوئی ساتھ نہیں دنیا میں
کیسا دستور ہے کچھ لوگ بچھڑتے ہی رہے
رات جب چاند اتر آیا مرے آنگن میں
تارے آکاش پہ پلکوں کو جھپکتے ہی رہے
آبلہ پائی کا دکھ تھا نہ مسافت کی تھکن
سوئے منزل یونہی چپ چاپ سے چلتے ہی رہے
اک کہانی ہی رہی دنیا میں ہر دم زندہ
یہ الگ بات ہے کردار بدلتے ہی رہے
-
زبیر احمد نے لکھنے کا آغاز ہفت روزہ بچوں کا اسلام کراچی سے کیا پھر تمام دیگر رسائل ماہنامہ ذوق و شوق تعلیم و تربیت نونہال بچوں کی دنیا بچوں کا باغ اور جگنو میں لکھنے کا سلسلہ جاری رہا
تعلیم کے دوران ہی صحافت سے منسلک ہوگئے پوسٹ مارٹم گروپ آف نیوز پیپر میں کرائم رپورٹر کے طور پہ کام کیا اس کے علاوہ روزنامہ بھلیکھا ( پنجابی اخبار ) میں صحافتی ذمہ داریاں نبھائیں
رائل نیوز چینل لاہور میں ایڈمن آفیسر کے طور پہ 2 سال کام کیا
اس کے علاوہ ماہنامہ اذان فجر ۔ ماہنامہ ذوق و شوق کے نمائندہ لاہور کے طور پہ کام کیا
اینٹی ڈرگ میگزین میں سب ایڈیٹر کے طور پہ کام کیا
آج کل انٹرنیشنل یونین آف رائٹرز ۔این ایف سٹوڈیو کے ساتھ منسلک ہوں
لاہور سمیت دیگر شہروں میں مشاعرہ پڑھنے کا اعزاز حاصل ہے اور تاحال یہ سفر جاری ہے
پہلا مجموعہ کلام تیاری کے مراحل میں ہے
