سینے سے لگا کر زخموں کو مقتل سے نکل کر آئے ہیں
مت چھیڑنا ہم دیوانوں کو ہم آگ میں جل کر آئے ہیں
اک درد کہ جس کی لہروں نے تھا خاک کیا نابود کیا
اک زخم کہ جس کی ٹیسوں کی شدت سے پگھل کر آئے ہیں
اندر کی خلش ہونٹوں پہ میرے آنے کو تڑپتی رہتی ہے
کیا ان سے کروں فریاد جو خود کانٹوں پر چل کر آئے ہیں
اک ہنستا بستا گلشن تھا اک ہنستی بستی نگری تھی
پر آج وہاں سناٹاہے ہم جس سے دہل کر آئے ہیں
تھی رونق ساری بستی میں اک سانس کی ڈوری سے قائم
جب سانس گیا تو وحشت کے عفریت نکل کر آئے ہیں
جو لوگ میری خاموشی کے اسرار کو پانے نکلے تھے
ان بےدردوں کے جیون میں کچھ درد مچل کر آئے ہیں
کچھ اول صبح کی خاموشی کچھ شام کا ظالم سناٹا
جتنے سنگین مسائل تھے سب امبر حل کر آئے ہیں
سینے سے لگا کر زخموں کو مقتل سے نکل کر آئے ہیں
